José Antonio Domínguez Varela tomou posesión hoxe do seu cargo como xerente do Consorcio de Santiago, tras a aprobación do seu nomeamento no Consello de Administración do organismo que tivo lugar o pasado día 6 de febreiro e a súa publicación no Boletín Oficial do Estado (BOE) o día 14 de febreiro. A presidenta do ente interadministrativo e alcaldesa de Santiago, Goretti Sanmartín, estivo presente durante o acto administrativo no Pazo de Vaamonde, sede do Consorcio de Santiago.

O novo xerente foi designado tras un proceso que por primeira vez se desenvolveu cunha convocatoria aberta publicada no BOE con base a uns criterios acordados no seo do propio Consorcio no que están representados as tres administracións. Para o proceso de selección de libre designación, o Consorcio convocou unha comisión de selección na que participaron as tres administracións e que incluíu entrevistas ás persoas candidatas.

José Antonio Domínguez Varela

José Antonio Domínguez Varela é Licenciado en Dereito pola Universidade de Santiago de Compostela e conta cunha dilatada experiencia na Administración autonómica. Actualmente, dende novembro de 2024, desempeñaba a función de subdirector xeral de Emprendemento na Dirección Xeral de Traballo Autónomo e Economía Social da Consellería de Emprego e, con anterioridade, foi vicesecretario xeral na Secretaría Xeral Técnica da actual Consellería de Vivenda e Planificación de Infraestruturas.

Ademais, tamén foi presidente da Asociación de Veciños e Veciñas Río Sarela de Santiago de Compostela, dende 2022; e vicepresidente da Federación de Asociacións Veciñais do Rural de Santiago de Compostela, desde xullo de 2024.