O Consorcio de Santiago presentou este sábado 5 de abril no Espazo Educativo e de Lecer María Miramontes os contos-guías de Os Bolechas: As prazas de Compostela e Museos de Santiago de Compostela, escritos por Pepe Carreiro e coeditados polo Consorcio de Santiago e a editorial Bolanda.

Ao acto asistiron a alcaldesa e presidenta do Consorcio de Santiago, Goretti Sanmartín; o xerente do Consorcio de Santiago, José Antonio Domínguez, e en representación da editorial Bolanda, Antonio Couto e Tomás Valín. A presentación tamén contou coa asistencia de dous dos personaxes de Os Bolechas, Tatá e Braulio, que acompañaron as autoridades durante a presentación e desenvolveron ao final un xogo ao estilo “Quen é Quen?" sobre Os Bolechas para as crianzas presentes.

O xerente do Consorcio de Santiago, José Antonio Domínguez, salientou a importancia destes libros como ferramenta para achegarse, desde a institución que dirixe, aos máis pequenos e pequenas da cidade, amosándolle o seu patrimonio dun xeito lúdico e didáctivo. Lembrou ademais o traballo que se desenvolve desde o Consorcio en materia de publicacións, con 170 obras editadas.

Na súa intervención, a alcaldesa e presidenta do Consorcio de Santiago, Goretti Sanmartín, compartiu coas persoas que asistiron ao acto os contidos dos dous libros e fixo fincapé no seu valor, xa que ensinan o patrimonio e a cultura de Santiago dunha maneira didáctica e interesante para os máis pequenos e pequenas.

Para Goretti Sanmartín estas publicacións invitan a coñecer e a desfrutar dos museos e das prazas e, en xeral, de todo o patrimonio de Santiago, ao tempo que converten aos nenos e nenas en embaixadores da súa cidade. Son, tal como apuntou, uns libros que nos ensinan e que nos animan “a presumir de cidade”.

Recordou tamén que esta presentación coincide cos actos de celebración do 130 aniversario de María Miramontes, unha figura senlleira da historia de Galicia estreitamente vinculada a Santiago, xa que o seu marido, Ánxel Casal, foi alcade da cidade no 1936.

As prazas de Compostela e Museos de Santiago de Compostela son publicacións nas que os personaxes de Os Bolechas percorren Santiago de Compostela descubrindo, respectivamente, as prazas e os museos da cidade. Deste xeito, achegan o patrimonio arquitectónico e etnográfico de Compostela aos nenos e nenas dunha maneira lúdica e sinxela, poñendo en valor os recunchos de Santiago e favorecendo que as crianzas recoñezan os espazos que as rodean. Os dous libros  inclúen un caderno de actividades para afondar no contido dos contos a través de xogos prácticos e creativos, como sopas de letras, contidos para completar e debuxos para colorear.

Sobre o autor

Ilustrador e deseñador, comezou a súa traxectoria en 1977 co cómic O fillo de Breogán en A Voz do Pobo. Foi un dos fundadores de Can sen Dono, revista que dirixiu, e colaborou con multitude de publicacións como La Codorniz, Mundo Obrero, El Pueblo Gallego, Faro de Vigo, A Nosa Terra, La Voz de Galicia, El Correo Gallego, Tempos novos, Retranca ou a TVG, entre outras.

Tamén publicou a saga La retirada de Sir John Moore na primeira etapa da revista Golfiño, que despois foi compilada en formato álbum por Xerais. Pero, sen dúbida, a gran sona deste polifacético artista veulle tras o éxito de Os Bolechas, que levan publicándose desde o año 2000 e xa se converteu nun referente cultural en Galicia, coa súa serie de televisión, os espectáculos de muppets e bonecos corpóreos, o autobús Bolechas, a colección de xoias, os discos etc.